કંગના રનૌત અને દિલજિત દોસાંજ વચ્ચે એકવાર ફરી સોશિયલ મીડિયા પર વર્ડ વોર શરૂ થઇ ગઈ છે. વાત એમ છે કે થોડા દિવસ પહેલાં દિલજિતે તેના ન્યૂ યર વેકેશનના અમુક ફોટોઝ સોશિયલ મીડિયા પર શેર કર્યા હતા. આ ફોટોઝમાં દિલજિત બરફના પહાડો વચ્ચે દેખાયો છે. આ બાબતે કંગનાએ દિલજિતને આડે હાથ લઈને ‘લોકલ ક્રાંતિકારી’ ગણાવ્યો. તેના જવાબમાં દિલજિતે એક વીડિયો પોસ્ટ કર્યો. આ વીડિયો પર કંગનાએ પણ પલટવાર કર્યો. પછી જવાબમાં દિલજિતે કંગનાને પોતાની PR બનાવી દેવાની વાત કરી દીધી.

આ છે આખો મામલો
પહેલા કંગનાએ દિલજિતે સોશિયલ મીડિયા પર શેર કરેલા વેકેશનના ફોટોઝ પર કમેન્ટ કરતા કહ્યું, ‘વાહ બ્રધર, દેશમાં આગ લગાવીને, ખેડૂતોને રોડ પર બેસાડીને લોકલ ક્રાંતિકારી વિદેશમાં ઠંડીની મજા લઇ રહ્યા છે. વાહ, આને કહેવાય લોકલ ક્રાંતિ.

તેના જવાબમાં દિલજિતે એક વીડિયો શેર કર્યો. આ વીડિયોમાં એક પંજાબી વૃદ્ધ ખેડૂત મહિલા કંગનાને થપ્પડ મારવાની વાત કહેતી દેખાઈ રહી છે. દિલજિતે આ વીડિયો શેર કરીને લખ્યું, એમ ન વિચારતા, અમે પંજાબી તે આપેલા સ્ટેટમેન્ટને ભૂલી ગયા છીએ. તને જવાબ મળશે.

ત્યારબાદ કંગનાએ દિલજિતના આ વીડિયોનો જવાબ આપતા લખ્યું, ‘સમય જણાવશે મિત્ર કોણ ખેડૂતોના હક માટે લડ્યા અને કોણ તેની વિરુદ્ધ. સો અસત્ય એક સત્યને છુપાવી ન શકે, અને જેને સાચા દિલથી ચાહો તે તમને ક્યારેય નફરત નથી કરી શકતા. તને શું લાગે છે તારા કહેવા પર પંજાબ મારી વિરુદ્ધ થઇ જશે? હા હા એટલા મોટા સપના ન જો, તારું દિલ તૂટી જશે.’

દિલજિતે કંગનાના આ જવાબ પર પલટવાર કરતા કહ્યું, ‘ખબર નહીં ખેડૂતોથી તમને શું પ્રોબ્લેમ છે. મેડમ અમે બધા પંજાબી ખેડૂતો સાથે છીએ અને તમારા વિશે તો કોઈ વાત પણ નથી કરી રહ્યું. દિલજિતે આગળ લખ્યું, હું તને PR બનાવી લઉં છું. કારણકે હું તારા દિમાગમાંથી ક્યારેય જતો જ નથી.